Ekitongole ky’Obwakabaka eky’ebyempuliziganya ekya Airtel K2 ejjudde kizzizza buggya Omukago ne Airtel ogubadde gumaze emyaka esatu nga guyinda.
Mu ndagaano eteereddwako omukono Ssenkulu wa K2 telecom, Arthur Mawanda ne Ssenkulu wa Airtel, Manoj Murali kitegeerekese nti kkampuni eno yaakwongera okunnyikiza obuweereza bwayo wansi mu byalo naddala mu Buganda okulaba ng’abantu ba Kabaka yonna gye bali baganyulwa mu mukago guno butereevu.
Omukolo guno guyindidde ku mbuga enkulu e Bulange e Mmengo ku Lwokutaano lwa wiiki eno.
Katikkiro Charles Peter Mayiga ng’abaddewo ng’omujulizi ng’endagaano eno ezzibwa obuggya, ategeezezza nti tekinologiya omuli ne ebyempuliziganya ntabiro nnene ey’enkulaakulana buli omu gy’asaanye okwettanira.
Owek. Mayiga annyonnyodde nti omukago guno omuggya ogukoleddwa Obwakabaka bwakugukuuma kuba nnamuziga y’amaanyi mu kutumbula Buganda n’abantu ba Kabaka naddala mu byenfuna.
Ate ye Omumyuka owookubiri owa Katikkiro, Owek. Robert Waggwa Nsibirwa agambye nti omukago guno gwakuyambako okukyusa obulamu bw’abantu ba Kabaka kubanga gwa muwendo nnyo.
Ye omukungu wa kkampuni ya Airtel, Remy Kisaakye ategeezezza nti okuva Airtel lwe yatta omukago n’Obwakabaka, eyongedde okuyitimuka mu mpeereza ne yeeyama okukuuma omukago guno.
Omukolo guno gwetabiddwako abakungu ba Kabaka ku mitendera egy’enjawulo