Ttiimu y’essaza lya Buweekula etadde amaanyi mu kulwanirira ekikopo ky’omwaka guno 2021 oluvannyuma lw’okuwangula Buluuli ggoolo 3-0 mu mpaka eziyindidde mu kisaawe kya FUFA Technical Center, Njeru leero ku Mmande.
Ggoolo eyasoose yateebeddwa Ismail Tamubula ne Shafik Kakande ate endala n’eteebebwa Frank Mulindwa.
Tamubula yaggyeeko Isaac Musiima bw’atyo n’ateeba Abdul Salim Ssekamwa mu ddakiika ttaano zokka ez’omuzannyo.
Kakande yabongedde ggoolo oluvannyuma lw’okufuna omupiira okuva ku Lucky John Kasagga mu ddakiika 25.
Ggoolo ya Tamubula eyookubiri yazze ebula eddakiika 9 zokka ekitundu ky’omuzannyo ogusooka okuggwa, n’aweza ggoolo eyookutaano mu mpaka zino era ekitundu eky’omuzannyo ekyokubiri temwabaddemu ggoolo.
Kino kitegeeza nti Buweekula ye ttiimu eyasoose okugenda ku mutendera gwa Semi – Fayinolo n’etangaaza emikisa gyayo okutwala ekikopo.
Akawungeezi ka Mmande, ttiimu ya Buddu ekubye Kyaddondo 2-1 n’eyitawo okwegatta ku Buweekula.
Omusambi Geofrey Gaganga ne Bruno Bunyaga be bateebedde Buddu. Ggoolo ya Kyaddondo emu yokka yateebeddwa Patrick Oyeeti.
Kati Kyaggwe egenda kuzannya Mawokota enkya ne Bulemeezi ezannye Busiro okulondako abaneegatta ku bayiseewo.
Tulinze kulaba ani anaawangula ekikopo ky’omwaka guno kuba Ggomba eyatwala eky’omwaka oguwedde yavaamu dda